Far East Mission Church (FEMC) Biakinn neih theih na vai tawh ki sai in Pasian na sep na lianpi hi in, Pasian Khasiangtho ma kaih na hang bek in ki ngah a hih man in pawlpi tang thu lianpi a hih na tawh kep ding ci in a thu cing in ka bawl a hi hi. Pasian na sep na lianpi hang in a ma min siangtho ka pah tawi hi. Ih biak Pasian in min than na ngah ta hen. A thu a nuai a bang a hihi.
BIAKINN VAI
February 16, 2015 ni in FEMC biakinn ngah na tawh ki sai, ka phawk leh ka ciap teh dan a nuai a bang hi.
Nu Khan te inn ah a tung KIIM ministry sap na tawh kawlgam pan ong zin Sia Tuang pau zong Nu Khan in FEMC te biakinn ngah nang in ni 30 val Pasian in ong sawl in thu nget loh pha mawh in State dang ah zin nai ken ci in kho a hih man in Sia Tuang Pau zong a tawp dong mah thu ong nget pih hi. Pasian in thu pha ong piak sak ta hen.
– FEMC pawlpi in November 11, 2007 ni in ki pan khia in tua lai a ki pan, biak piak na mun 3 ki zang in hotel te ki sap zeel in Office mun 2 ah ki sap hi.
– April 2012 dong Woodlake AG biakinn ah a sap la lo in ong zang sak uh hi. Tua hun sung in office ding ki sam a hih man in Cityplex tower ah room khat ki sap in Sanini thu nget na zong tua lai mah ah tawl khat ki nei hi.
– Tua lai pan in Office leh thu nget nang mun ding 72 leh Lewis ah ki sap hi.
– May 2012 a ki pan Woodlake AG Biakinn zang thei non lo in, Biak piak na ding mun 81st leh Harvard ah ki kawm hi.
– June 2013 pan 101 leh Yale ah Biakinn ding in River Oaks Presbyterian te Biakinn building 1 ki sap in, veng leh pam te complain na hang in Sunday ki khop na pen a ki sap na building ki zang thei non lo in, a mau biak piak na mun leh Sunday school room te a nai in ki sap beh hi. Nipi sim in a hun ciang tan zah sang a hun val ki zang to den zaw a hih man in overtime man zong ki pia to lai a hih man in biakinn sap in sum leh pai tam pi ong bei to hi. Tua ban ah inn teek biakinn nei ten vai thupi a neih ni te un hotel zat loh pha mawh a hih man in, hotel ni 1 sap pen $2500-2900 ciang bang bei in sum bei na ki beh lap hi.
– Tua bang teng hang in thu um mi te in sumpi leh biakinn a ding ki suuk in pia khia hi na pi in biakinn lei zawh nang sum tam om zo lo hi.
– November 2015 in tu lai tak a biak piak na mun ki zuak cih a ki zak phet in ki en pah a, ki deih mah mah hi. Pastor pa Sia Khamno in Nu Khan kiang ah biakinn ki zuak khat ong et pih in, a et na ah ong pai in thu ong nget pih in ci in a sap ciang in, Nu Khan in Pasian kiang ah pai ding pai loh ding cih thu ka dot leh pai in FEMC ten hih biakinn a ngah dong thu nget na tawh pan pih in ci a hih man in biakinn a sung a pua et na ah ong pai in, hih biakinn khah suah lo ding , aman lang pen in khamna sum zong pia pah un ci in ong pu laak in, tua ni a ki pan biakinn tawh ki sai thu nget ding Nu Khan in ong pu laak hi.
– Biakinn ki deih mah mahin a hi zong in a bei sa in, biakinn lei nang Siapa in sum leitawiin mun 4-5 bang a pai na ah sum lei tawi tam ong ki prove lo a hih man in ih din mun tawh sum leh pai ki cing lo ban ah sum lei tawi ih ngah nang in thu naak nget mah mah kul ding a, Pasian na sep na lam dang om kei leh lei tawi ki ngah lo ding a hih lam ka thei hi.
– 2010 kum pan OK district zum ah Nu Khan leh ko nupa pai in Nu Khan in China ah a na sep na, America ah Pasian sawl na tawh ong pai in gam leh kumpi te a ding Pasian sawl na tawh a sep teng gen in DC superintendent pa leh ma kai ten tha ngah mah mah uh hi.
– AG district tawh ki zop na ah kum sim in pawlpi in ii sep teng ki report kul hi. 2014 ciang ciang, pawlpi in ih sep gen taak ding om lo a hih man in Siapa mah in Nu Khan kiang ah KIIM ministry ma kaih na tawh sep na ah kong ki hel na te ih uh ka pu laak ci hi. Tua bang teng hang in zong OK AG district a ma kai te leh Superintendent pa mai ah zong mai pha ki ngah tuam in biakinn lei nang ah DC superintendent pa in sum ong lei tawi te kiang ah ong huh nang un tha na pia hi.
– Hih AG ma kai te kiang ah thu pen, ma kai te kiang ah biakinn lei nang thu a ki gen ciang in, pawlpi mi tam na tawh biakinn ding lei ki tawi thei lo hi. Pawlpi mi pen khang thei, kiam thei hi ong cih san uh in, tua leh na pawlpi na sep na uh ong lak in ci in na gen a, tua lai tak in pawlpi na sep na lah theih ding om lo a, KIIM ministry na sep na ki pu laak hi, Siapa in Niang Khan aw ih biakinn lei nang tawh ki sai pawlpi na sep na ong ngen uh in ih lah khiat ding om nai lian lo a hih man in, KIIM ministry na sep nate pu laak ing ci in gen a, Nu Khan in ki ngah ei China gam a hi zong ka mission na sep nate ah no zong hong ki hel den hi ve uh cin ih vek pi a ih sep khop hi ei ci in phal tak in KIIM mimistry na sep na AG ma kai te kiang ah gen khiat theih na hong pia hi.
– November 2015 Thanksgiving ni khit a ki pan Kha 1 val Nu Khan in biakinn ngah nang thu nget ong ma kaih in ni sim zing sang 5am, 10 am, 7 pm cih te ah thu ngen khawm ding ci in a hi zong in ki pat ni a ki pan ki khawl thei non lo in sun tawh zan tawh thu ki ngen tan suak in 7 pm thu nget ki pat pen a zing ciang 9 am pawl in tawm ki tawl nga in tua bang in kha 1 val vil vel thu ki ngen to hi.
– Kha siangtho in na sem in Pasian na sem te sung mah pan sian suah na tawh ki pan to in a ki mu thei biakinn pi ngah na ding in a ki mu thei lo KST ten na biakinn hong ki sian suah ma sa hi. Kei ai tuam in tua hun a ki pan ka na sep pih te Itna leh ka mai ngap na ong khang in ham pha ka ki sa hi.
– Phalbi khua vot mah mah lai tak hi in a hun hun in zingsang khua vaak ma leh zan khua mial khit khawng in biakinn huang ah paiin building kiim ah thu ngen in lei lak ah a votpi tung ah bok in thu ka ngen zeel uh hi.
– Hih thu nget ki pat pan kha 1 sung mah pen Nu Khan pasal Pa Nang zato ah a lum na hi in kua mah in ki theih pih kha lo hi. Nu Khan in hih biakinn a ngah dong thu nget pih in ci a, a sawl Pasian thu mang in a hi zong in a pasal zato lum a hih man in thu nget khawl sawm phot hi ta mah leh a ta te in ko ka pa tavuan la nung, nang Pasian ong sawl sem in, lung hi mawh ken ci in a ta te in tawsawn in biakinn ah thu nget a ki pelh loh nang in tha pia in a mau unau in a pa leh inn lam tavuan la uh hi.
– Dec 16, 2015 in Nu Khan leh kei, sum lei tawi na In His Fund company te zum om na Pennslyvania ah pai in ni 3 ann tang in zan kim leh zing tung te mah zong thu ka ngen uh hi. A ni 3 ni teh Siapa leh Khai ong pai in ni 1 thu ngen to in a zing the Ih His Fund company owner pa CEO, president pa leh a dang thu nei mi dang 3 tawh company zum ah ki mu in sun ann ne khawm in Nu Khan in America ah Pasian sawl na tawh ong pai a hih na leh gam leh kumpi a ding na sep nate teci pang in lung kim in tha ngah mah mah uh hi.
– January kha 2016 in Nu Khan leh a ta te New York ah a om lai tak un zan 1 Pasian in hopih in tu mah mah in Penslyvania ah a zan zan in pai in, In His Fund te zum ah khua vaak ma in thu ngen un ci in sawl a hih man in mawtaw tawh New York pan nai 4 sung a zan zan in pai in a phual ah khua vot mah mah ta leh Pasian in khe tawh a zum vial 3 kiim khot in thu pia in ci a hih man in Pasian cih bang in sem uh hi. Tua lai tak in khua hun vot na pen -1c hi.
– A ki nung theih ciang in tua ni zum hon hun teh loan approve leh approve loh ding meeting a neih ni ding uh na hi mawk hi. Tua ni mah in sum lei tawi ong prove uh hi. Praise the Lord.
– Feb 16, 2016 ni in sign thuh in Biakinn key ki ngah in FEMC biakinn cih na thu ki ngah hi. Praise the Lord. Pasian na sep na lam dang hang bek hi kei leh Loan ngah ding a piang theih loh nang thu tam pi om in Loan ngah leh zong hak sa mah mah ding mun pan in Pasian heh pih na hang bek in loan ki ngah a biakinn ki nei thei hi.
– Biakinn key ngah khit teh Nu Khan in thu nget ong ma kaih suak in biakinn leh huang sung ah thu sia tuam tuam a om loh nang kha gal do na leh thu nget na ki nei to in biakinn pen thu nget na inn, mi nam tampi te ong pai na inn hi ding in thu ong nget pih to hi.
– Hih biakinn a ding thu nget hun sung in Pasian Kha siangtho in a hun hun in a ki sam bang in thu nget dan ong hilh zeel a, loan tawh ki sai a sem ding ten na sem lo cih a hi zong, vai kai thei a neng a tawng in kha gal do a ki sap hun, thum hun, phat hun , nget hun cih bang in ong kal suan toh pih na ka muh nate lam dang sa in Pasian min ka phat hi.
– FEMC biakinn ngah nang in Loan ngah nang lampi om lo leh Loan ngah leh zong hak sa leh a piang thei lo ding din mun a thei Pasian in a pian nang a tang tun nang in a tanu Nu Khan ong sawl in thu nget na tawh ngah dong Pasian sawl na mang in kei sang zong ci tak zaw in It na leh deih sak na tak tawh thu a nget ban ah biakinn lei nang Sum$ a tul bang zah hiam khat zong hong pia uh, a mah bek hi lo a ta te leh a pasal mah mah in tawsawn in sawl in a inn kuan un ong pan na hang in naak pih tak in Nu Khan leh a inn kuan Pasian in a lam dang in thu pha ong piak sak ta hen.
Topa min thang ta hen. Praise the Lord!!!
Siamah Cing (FEMC Care Pastor)
Recent Comments